44 günlük Vətən Müharibəsi – Bütövlükdə Azərbaycan tarixinin ən böyük hadisələrindən biridir. Uzun tarixi fasilədən sonra ilk dəfə ayağa qalxaraq, işğal altındakı torpaqları azad etdik. Bu, Azərbaycan xalqının və dövlətinin yaşadığı ən şərəfli, vüqarlı, qürurlu günlər idi. Həmin günlərin şahidi olmaq hər bir azərbaycanlı üçün böyük xoşbəxtlikdir.
Amma həmin hadisənin şahidləri ilə yanaşı, şəhidləri də var – tarixi yenidən yazan, bizə zəfər sevincini yaşadan, xalqını və dövlətini məğlubdan qalibə çevirən İgidlər, yeni əsrin Cəngavərləri! Onlar bu Zəfər üçün tərəddüd etmədən ən dəyərli və şirin nemətdən – həyatlarından keçiblər.
Biz həm cəmiyyət, həm də fərd olaraq onlara çox şey borcluyuq. Hər şeydən əvvəl isə onların özlərindən sonra qoyduqları böyük irsi – Qəhrəmanlıq İrsini,- toplamaq, öyrənmək, araşdırmaq və gələcək nəsillərə ötürmək lazımdır.
Bu irs hələ uzun illər Azərbaycan xalqının ruhunu kükrədəcək, hər kəsə bu torpağın necə oğullar yetirməyə qadir olduğunu göstərəcək. Sübut edəcək ki, himnimizdə oxunan “Hüququndan keçən əsgər hərə bir qəhrəman oldu” sözləri əsla sadəcə söz deyil. Bu saytda haqqında məlumat olan hər bir şəhidimiz şübhəsiz, qəhrəmandır.
Qəhrəmanlarımız haqqında məlumatları bir yerə toplamaq və daim yeniləmək bizim əsas missiyamızdır. Bu missiyanı yerinə yetirmək istiqamətində istənilən köməyə görə əvvəlcədən minnətdarıq.