Azərbaycan Ordusunun giziri olan Cahid Qəniyev 2020-ci il sentyabrın 27-də başlayan Vətən müharibəsi zamanı Tərtər rayonunun Talış qəsəbəsinin azadlığı uğrunda gedən döyüşlərdə düşmənin 1 ədəd avtomobil texnikasını və 20 nəfərə yaxın canlı qüvvəsini məhv edib.

Cahid Qəniyev sentyabrın 29-da Talış döyüşləri zamanı şəhid olub. Oktyabrın 13-də Biləsuvar rayonunun Çaylı kənd qəbiristanlığında torpağa tapşırılıb.

Cahidin kiçik qardaşı, xüsusi təyinatlı əsgər olan Mirsahib də Qarabağın azadlığı uğrunda döyüşüb və yaralanıb.

Ailəli idi, 1 övladı yadigar qalıb. Şəhidimizin həyat yoldaşına son sözü də "Atamı-anamı sənə tapşırıram, oğluma yaxşı bax!" olub.



Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamları ilə "Vətən uğrunda", "Suqovuşanın azad olunmasına görə", "Cəsur döyüşçü" medalları ilə təltif edilib.