Aqil Əliyev 2020-ci il sentyabrın 27-də ərazi bütövlüyümüz naminə başlayan Vətən müharibəsinə qatılıb. O, oktyabr 15-də Suqovuşan ətrafında gedən döyüşlərdə şəhid olub. Tovuz rayonunun Pələkli kəndində dəfn edilib.



Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Aqil Əliyev ölümündən sonra "Vətən uğrunda" , "Cəsur döyüşçü", "İgidliyə görə" medalları ilə təltif edilib.

Aqil hələ gənc yaşlarından hər zaman bayrağa sarılıb fotolar çəkdirər və anasına deyərmiş ki, "Mən bu bayrağı işğaldan azad edilən torpaqlarda qaldıracağam" . Bu istəklə də Aqil hərb sənətinin dərinliklərinə yiyələnib. Tovuz döyüşlərində məharətlə savaşan Aqil Şəhid Milli Qəhrəmanımız, General-mayor Polad Həşimovun nəşi qarşısında söz verir ki, onun qisasını alacaq. Beləcə Sentyabrın 27-dən döyüşə qatılan igidimiz üç hərbi vəzifəni icra etməklə düşmənə qan udduranlardan birinə çevrilib. Aqil Əliyevin göstərdiyi şücaətlər və cəsurluq döyüş yoldaşlarını da heyrətə gətirib.



Aqil evin son beşiyi olduğu üçün onu böyük bacısı böyüdüb. Ona görə də o hər sirrini, arzusunu bacısı ilə bölüşərmiş. Elə şəhadətə ucalacağını da bacısına deyib.

Şəhid hərbçimiz sonuncu dəfə anası ilə danışanda ona səhhətindən və qardaşı qızı Ayandan muğayat olmasını xahiş edib. Anasına deyə bilmədiyi sözləri isə sətr-sətr, bənd-bənd şeirə həkk edib.

Hələ gənc yaşlarından şerlər yazan Aqil ölümündən əvvəl məzar daşına yazılacaq sözləri də qeydə alıb...