Kamran 21 noyabr 1995-ci ildə Qax rayonu Marsan kəndidə anadan olub.

2013-cü ilin yanvar ayında hərbi xidmətə gedib və xidməti bitirib qayıtdıqdan sonra öz kəndində bərbər kimi işləməyə başlayıb. Elə uşaqlıq vaxtlarından vətənpərvər ruhda böyüyən Kamran İkinci Qarabağ müharibəsi başlanan gündən könüllü olaraq ön cəbhəyə yollanıb. Ailədə 3 qardaş olaraq böyüyən Kamran qardaşlarının ən böyüyü olub. Döyüş bölgəsindən ailəsi ilə danışanda "hər şey yaxşıdır,məndən nigaran qalmayın",- deyib.

Müharibə zamanı Baş atıcı kimi hərbi xidmətini yerinə yetirib. Döyüş bölgəsində müxtəlif ərazilərdə qəhrəmancasına vuruşub. Füzuli şəhərinin azad olunmasında xüsusilə igidlik göstərib. Şuşa şəhərinin işğaldan azad edilməsi əməliyyatında döyüş yolu keçib.

8 noyabr 2020-ci ildə Şuşa şəhəri istiqamətində gedən döyüşlərdə şəhid olub.

Prezident İlham Əliyevin müvafiq sərəncamları ilə "Vətən uğrunda" , "Cəsur döyüşçü" , "Füzulinin azad olunmasına görə" və "Şuşanın azad olunmasına görə" medalları ilə təltif edilib.