Novruz Cumalı oğlu Həsənov 1996-ci ilin 20 fevralında Gədəbəy rayonunda doğulub. Evin tək oğlu idi. Gənc yaşlarından idmana həvəsi var idi. 6 yaşından cüdo ilə məşğul olmağa başlayıb balaca Novruz. Bir çox yarışlara qatılıb 15-dən artıq medal və diplomlar qazanmışdı. Bakı Dövlət Universitetinin İqtisadiyyat və Humanitar Kollecini bitirib. Vətən müharibəsinin ən qaynar nöqtələrində iştirak edərək igidlik göstərib Novruz.
Novruz Həsənov 29 senyyabrda könüllü olaraq Vətənin keşiyini çəkməyə yollanıb. İlk öncə Murovdağ uğrunda gedən döyüşlərdə iştirak edib. Daha sonra Füzulinin kəndlərinin alınmasında igidlik göstərib. Noyabrın 6-da Novruz Şuşaya yola düşüb. Əlbəyaxa döyüşlərdə 6 ermənini məhv edib, lakin ayağından və kürəyindən yaralanıb. Şuşa şəhərinin işğaldan azad edilməsi uğrunda gedən qızğın döyüşlərdə 9 noyabr tarixində şəhid olub. Şəhid Novruz Həsənov noyabrın 14-ü doğma Gədəbəyində dəfn edilib.
Ölümündən sonra Novruz Həsənov müvafiq Prezident Sərəmcamlarına əsasən «Vətən uğrunda», «Hərbi xidmətlərə görə», «Şuşanın azad olunmasına görə» medalları ilə təltif edilib.
