Quliyev Vüqar Füzuli oğlu 2001-ci il dekabrın 11-də Ağsunun Qaraqaşlı kəndində anadan olub. İlk öncə Şəhid Polad Mirzəyev adına 5 saylı orta məktəbdə oxuyub, daha sonra isə təhsilini 4 saylı Ağsu şəhər orta məktəbində davam etdirib. Uşaqlıqdan sənət vurğunu olan Vüqar Bakı şəhərində 1 saylı peşə liseyində qaynaqçı sənətini öyrənib.
Əsgəri xidmət vaxtı çatdıqda məktəbi yarımçıq qoyaraq Vətənə əsgəri borcunu vermək üçün əsgəri xidmətə yollanıb. Füzuli rayonunda N saylı hərbi hissədə əsgəri xidmətə başlayıb. Xidmət zamanı rəhbərliyin bütün tapşırıqlarını nümunəvi əsgər kimi yerinə yetirib.
27 sentyabrda erməni quldurlarının etdiyi növbəti hücum zamanı Ali Baş Komandanın verdiyi əks hücum fərmanı ilə ruhlanan İgidimiz döyüşə gedib. Ana və atasına isə döyüşdə olmadığını deyib. Bir çox döyüşlərdə iştirak edib. Axırıncı dəfə telefon ilə əlaqə zamanı qardaşına ağ göyərçin almağı tapşırıb və deyib: "Gətirib burada uçurdacağam".
Hələ 12-13 yaşlarından şəhid olmağı arzulayırdı. Kimsə də deyəndə deyərdi: "Mən sizi hazırlayıram ki, mən şəhid olsam ağlamayasınız".
Xocavənddə gedən döyüş zamanı noyabr ayının 3-də düşmənin xain atışı zamanı igid əsgərimiz şəhadət şərbətini içib.
2020-ci il 8 may Şuşanın işğalı günü xidmətə gedən İgidimiz 2020-ci il 8 noyabr Şuşanın azad olduğu gün Ağsu Şəhidlər Xiyabanında torpağa tapşırılıb.
Ölümündən sonra "Vətən uğrunda" , "Xocavəndin azad olunmasına görə" və "Füzulinin azad olunmasına görə" medallarıı ilə təltif edilib.
