İntiqam Eynulla oğlu Hacıyev 1998-ci ilin noyabr ayının 10-da Ağcabədinin Minəxorlu kəndində anadan olub. Kənddə tam orta məktəbi bitirib. 2020-ci ilin sentyabr ayının 21-də ordu sıralarına gedib. Xocavənd rayonunda gedən döyüşlərdə vuruşub. Yaralanıb, Muğanlı kəndində yerləşən hərbi tibb məntəqəsinə gətirilərkən ikinci dəfə düşmən gülləsinə tuş gəlib. İntiqam oktyabr ayının 13-də Yuxarı Qiyaməddinli kəndi yaxınlığında şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən İntiqam Hacıyev ölümündən sonra "Vətən uğrunda" medalı ilə təltif edilib.
Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən İntiqam Hacıyev ölümündən sonra "Xocavəndin azad olunmasına görə" medalı ilə təltif edilib.
