Azərbaycanın Daxili İşlər Nazirliyinin Daxili Qoşunlarının baş çavuşu olan Vüqar Cəfərov 2020-ci il sentyabrın 27-də başlanan Vətən müharibəsi zamanı Cəbrayılın azadlığı uğrunda gedən döyüşlərdə savaşıb. Vüqar Cəfərov oktyabrın 5-də Cəbrayıl döyüşləri zamanı şəhid olub.

Qardaşı Hacı Cəfərov İnşallah oğlunun verdiyi məlumata görə, qardaşı Cəfərov Vüqar anasının doğulub boya- başa çatdığı Cəbrayıl rayonu, Məzrə kəndinin işğaldan azad olunduğu gün şəhid olub.

Qardaşı bizimlə söhbətində igidimizin digər qəhrəmanlıqlarından da danışdı:

"Vüqarın döyüş yoldaşlarının verdiyi məlumata görə, qəhrəmanımızın öldürdüyü ermənilərin içərisində "Vəhşi" ləqəbli Xocalı soyqırımı iştirakçısı olmuş, düşmən polkovniki də olub.

Xocalının qisasını alan qəhrəman şəhidimiz sinəsindən iki güllə yarası almağına baxmayaraq, düşmənə doğru irəliləyib. Yaxın məsafədə mövqe tutub əlindəki PK-nı sinəsinə dirəyərək 20-dən çox düşməni məhv edib.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən, Vüqar Cəfərov ölümündən sonra "Vətən uğrunda" medalı ilə təltif edilib.

Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Vüqar Cəfərov ölümündən sonra "Cəbrayılın azad olunmasına görə" medalı ilə təltif edilib.

Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən, Vüqar Cəfərov ​ölümündən sonra "Kəlbəcərin azad olunmasına görə" medalı ilə təltif edildi.