Azərbaycan üçün önəmli olan Qarabağ münaqişəsi 30 ildən sonra öz həllini tapdı. Deyirlər, torpaq uğrunda ölən varsa, Vətəndir! Qarabağı azadlığa qovuşduran isə müqəddəs şəhidlik məqamına yüksələn neçə-neçə cəsur, mərd qəhrəmanlar oldu. Bu qəhrəmanlardan biri də Samir Nadirovdur.
Samir Əlicəttar oğlu Nadirov 1992-ci il avqustun 16-da Sumqayıt şəhərinin Corat qəsəbəsində anadan olub.
3 il hərbidə MAXE olaraq xidmət göstərib. Şəhid olduqdan sonra qəhrəmanımıza kiçik çavuş adı verilib.
Azərbaycan Ordusunun kiçik çavuşu olan Samir Nadirov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Hadrut qəsəbəsinin və Füzulinin azadlığı uğrunda gedən döyüşlərdə savaşıb. Şəhidimizin dəstəsi düşmən hücumlarından qorunmaq üçün Hadruta giriblər, bu zaman ermənilər tunelin qarşısını kəsərək içərisinə qrantamyot atıblar. Partlayış zamanı Samirlə birlikdə sağ qalanları da güllələyiblər. Həmlə taborunun bütün şəxsi heyəti Vətən üçün canını fəda edərək şəhid olub. Samir Nadirov oktyabrın 15-də Füzuli döyüşləri zamanı şəhid olub.
Şəhidimiz Samirin Emil və Məryəm adlı 2 övladı var.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 2020-ci il 15 dekabr tarixli Sərəncamına əsasən Samir Nadirov ölümündən sonra "Vətən uğrunda" medalı ilə təltif edilib.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 2020-ci il 25 dekabr tarixli Sərəncamına əsasən Samir Nadirov ölümündən sonra "Füzulinin azad olunmasına görə" medalı ilə təltif edilib.
