Şöhrət Canpolad oğlu Əliyev 30 oktyabr 1999-cu ildə Gəncədə dünyaya gəlib. Ailənin ortancıl oğlu olub. Gəncə şəhər Məhəmməd Füzuli adına 22 saylı tam orta məktəbdə təhsil alıb, sonradan Məşədi Əzizbəyov adına 15 saylı tam orta məktəbdə təhsilini davam etdirib, məzun olub. 2018-ci ilin yanvar ayının 8-i hərbi xidmətə yollanan Şöhrət 2019-cu ilin iyul ayında xidmətini başa vurub.
Şöhrət 27 sentyabrda başlayan İkinci Qarabağ müharibəsinə könüllü yazılaraq döyüşlərə yollanıb. 8 noyabr tarixində Şuşa uğrunda gedən döyüşlərdə qəhramancasına şəhidlik zirvəsinə ucalıb. Şəhidin cənazəsi 16 noyabr tarixində ailəsinə təhvil verilərək bir gün sonra doğulduğu Gəncədə Şəhidlər Xiyabanında dəfn edilib.
Azərbaycan Respublikasının Prezidenti İlham Əliyevin Sərəncamlarına əsasən, ölümündən sonra
"Vətən uğrunda", "Şuşanın azad olunmasına görə" və
"Cəsur döyüşçü" medalları ilə təltif edilib.
