Bu günlərdə şəhid Hüseyn Səmədovun anadan olmasının 24-cü ildönümünə həsr olunan tədbir onun məzarı başında qeyd edilib.

Müharibənin ilk günlərindən döyüşlərdə fəal iştirak edən Hüseyn Səmədov silahdaşları ilə birgə düşmənə müxtəlif istiqamətlərdən zərbələr endirərək xeyli sayda canlı qüvvəni və hərbi texnikanı sıradan çıxarmağa nail olub. Növbəti döyüş əməliyyatlarının birində Hüseyn Səmədov şəhidlik zirvəsinə ucalıb.



Hüseynin anası Şamama Səmədova deyir ki, oğlunun sanki ən böyük arzusu olub şəhidlik məqamı: "Sentyabrın 27-də müharibə başladı, 28-i günü işdə idim. İşdən gələndə Hüseyn dedi ki, bəs mənə gözaydınlığı ver, məni də çağırıblar müharibəyə. Dedim, Hüseyn onun da gözaydınlığı olur, bala, müharibədir? Sonra qəfil xəbər çıxdı ki, rayona ilk şəhidin nəşi gətirilib. Qohum-əqraba da Hüseyni sabah müharibəyə yola salmağa gəlmişdi. O hamını evdə qoydu, getdi şəhidin dəfninə. On gündən sonra özü şəhid oldu".
Şəhidin dayısı Teymur Mustafayev də müsahibəsində Hüseyn haqda xatirələrini Sputnik Azərbaycan ilə bölüşüb. ”Çox qanacaqlı, qabiliyyəti ilə tanınan uşaq idi. Hər kəsə hörməti, izzəti vardı, Quran oxuyan, namaz qılan, dindar uşaq idi. Valideyndən üstün bayrağını sevirdi. Körpəliyindən bayraq evdədir, harada bayraq gördü, alardı. Bu insan bayraqla yatıb, bayraqla dururdu".

Azərbaycanın ərazi bütövlüyünün təmin edilməsi uğrunda qoyulmuş tapşırıqların icrası zamanı verilmiş tapşırıqları şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Hüseyn Səmədov ölümündən sonra "Vətən uğrunda" medalı ilə təltif edilib.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Hüseyn Səmədov ölümündən sonra "Füzulinin azad olunmasına görə" medalı ilə təltif edilib.