Azərbaycan üçün önəmli olan Qarabağ münaqişəsi 30 ildən sonra öz həllini tapdı. Deyirlər, torpaq uğrunda ölən varsa, Vətəndir! Qarabağı azadlığa qovuşduran isə müqəddəs şəhidlik məqamına yüksələn neçə-neçə cəsur, mərd qəhrəmanlar oldu. Bu qəhrəmanlardan biri də Azərbaycan Ordusunun əsgəri olan Emin Qədirovdur.
Qədirov Emin Asif oğlu 1995-ci il aprelin 25-də Bakı şəhər Xəzər rayonunun Zirə qəsəbəsində dünyaya göz açıb. Orta təhsilini Zirə qəsəbəsində 241 N-li məktəbdə alıb. Məzun olduqdan sonra Azərbaycan Memarlıq və İnşaat Universitetinə qəbul olub. Ali təhsilimi aldıqdan sonra 2017-ci ildə hərbi xidmətə yollanır.
Azərbaycan Ordusunun əsgəri olan Emin Qədirov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Döyüş zamanı düşmənin bir neçə texnikasını məhv edib.
21.10.2020-ci ildə Füzuli rayonu Gecəgözlü kəndi istiqamətində düşmən üzərinə hücuma kecərkən şəhidlik zirvəsinə ucalmışdır.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Emin Qədirov ölümündən sonra "Vətən uğrunda" medalı ilə təltif edilib.
