Miriyev Sənan Arif oğlu 1998-ci il mart ayının 1-də Beyləqan rayonunun Allahyarlı kəndində anadan olub. Xocalı şəhər sakinidir. Xocalı şəhər 4 saylı orta məktəbin məzunu olub. Sənan 2016-cı ilin aprel ayında hərbi xidmətə çağırılıp. Dövlət sərhəd xidmətində çavuş kimi hərbi xidməti başa vurduqdan sonra ehtiyyata buraxılmışdır. Lakin onun hərb peşəsinə olan məhəbbəti yenidən hərbi forma geyməsinə səbəb oldu. Atasının digər sahədə çalışma istəyinin əksinə çıxaraq hərbçi olmağı üstün tutdu. 2020-ci il sentyabrın əvvəlində könüllü olaraq ordu sıralarına ərizə verdikdən sonra Azərbaycan Ordusunun əks-kəşfiyyat bölüyünə yazılaraq müddətdən artıq həqiqi hərbi xidmətə başlamışdır. Onun çoxdankı arzusu əmisi oğlu Miriyev Surət kimi Xüsusi Təyinatlı Qüvvələrdə xidmət etmək idi. Sənanın kəşfiyyatçı olmaq arzusu gerçək oldu. Damarlarında Xocalı qanı axan Sənan həmin başıbəlalı torpağı görməsə də, oranı böyük məhəbbətlə sevirdi. Torpağa, Vətənə məhəbbət ona genetik olaraq valideynlərindən keçmişdi. Böyüklərin danışığından o, Xocalı faciəsi haqqında hər şeyi bilirdi. Xocalı faciəsi zamanı onun yaxın qohumları, bibisi, bibisinin qızı və oğlu şəhid olublar. Bax odur ki, vaxt yetişəndə Sənan tərəddüd etmədən, bir an belə düşünmədən Xocalı qırğınının qurbanlarının qanını, qisasını almaq üçün cəbhəyə yollandı. Özü müharibədə qəhrəmancasına həlak olub, şəhidlik zirvəsinə ucaldı. Sənan torpaqlarımızın azad edilməsi uğrunda canını fəda edən şəhidlərimizdən biri oldu.

Azərbaycan Respublikasının Prezidenti İlham Əliyevin müvafiq Sərəncamına əsasən "Vətən uğrunda" medalı ilə təltif edilmişdir.

Vətən Müharibəsi Sənan kimi minlərlə igid oğullarımızın öz hünərini, Vətənə sevgisini və düşmənə nifrətini göstərmək üçün bir imkan oldu. Bir-birinin hünərindən ilham alan igid əsgərlərimiz düşmənin üstünə qorxmadan irəlilədilər. Qorxmaz oğullarımızın sayəsində tarixi torpaqlarımızı bərpa etdik. Sənan da Vətən müharibəsində cəsur döyüşçü kimi iştirak edərək qəhrəmancasına şəhid oldu. 27 sentyabr tarixdə Talış və Suqovuşan istiqamətində gedən döyüşlərdə şəhadət şərbətini içərək əbədiyyətə qovuşub. Sənanın cismi canını qurban verdiyi müqəddəs torpağımıza qarışdı. Şəhidlərimiz Vətən torpağına qarışmaqla müqəddəs torpağın parçasına çevrildilər. İndi Sənanın və bütün şəhidlərimizin uyuduğu torpaq xalqımızın ən əziz ziyarət yeridir.

Şəhid Miriyev Sənan Ağcabədi rayonu "Şəhidlər" Xiyabanında dəfn edilib. Ruhu şad olsun!

memorial.az