Nihad Heydər oğlu Əliyev 22 noyabr 2000-ci ildə Ağcabədi rayonunun Taxtakörpü qəsəbəsində anadan olub. Əslən Laçın rayonunun Alxaslı kəndindən idi. 2007-ci ildə Alxaslı kənd orta məktəbində təhsil almağa başlayıb, 2016-cı ildə bu məktəbin 9-cu sinfini bitirərək Zərdab rayon peşə məktəbinə daxil olub.

3 iyun 2019-cu ildə həqiqi hərbi xidmətə çağrılıb və Gəncə şəhərində hərbi xidmət keçib. Üç ay sonra xidmətini Xüsusi Təyinatlı Qüvvələrdə Göytəpə şəhərində davam etdirib.

Azərbaycan Ordusunun əsgəri olan Nihad Əliyev Vətən müharibəsi zamanı Kəlbəcər rayonun Koroğludağ istiqamətində gedən döyüşlərdə iştirak edib. Nihad Əliyev 28 sentyabr 2020-ci ildə Göygöl rayonu ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı qəlpə yarasından şəhid olub.

Azərbaycan Respublikasının ərazi bütövlüyünün təmin olunması uğrunda döyüş əməliyyatlarında iştirak etmiş və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmiş Silahlı Qüvvələrinin əsgəri Nihad Heydər oğlu Əliyev “Vətən uğrunda” , “ Kəlbəcərin azad olunmasına görə” , “Vətən müharibəsi iştirakçısı” medalları ilə təltif olunub.