Xəlilov Fəryad 1 noyabr 1999-cu il tarixdə Ağcabədi rayonu Hüsülü kəndində dünyaya göz açıb. O, Vətən müharibəsində Qubadlı istiqamətində gedən döyüşlərdə qəhrəmancasına şəhid olub. Qəhrəmanımız 27 oktyabr 2020-ci il tarixdə Ağcabədi şəhərində Şəhidlər Xiyabanında dəfn edilib.
Azərbaycan Respublikasının 15 dekabr 2020-ci il tarixli sərəncamı ilə “Vətən uğrunda”, ”Cəbrayılın azad olunmasına görə”, “Qubadlının azad olunmasına görə” medalları ilə təltif olunub.
Fəryad Hüsülü kəndinin sevilən gənclərindən olub. Tərbiyəli, böyük-kiçiyin yerini bilən, yaşına görə geniş bir dünyagörüşə malik olan Fəryad kəndlərindəki Cavad Həsənov adına kənd tam orta məktəbini bitirib. Eyni zamanda 10 yaşında olanda Hüsülüdəki Yeddi illik musiqi məktəbinin piano şöbəsində də təhsil almağa başlayıb. Musiqiyə olan həvəsi onunla bir böyüyüb, püxtələşib. Güclü musiqi duyumu var imiş.
O, 2018-ci ilin yanvarında ordu sıralarına yollanıb 2019-cu ilin ortalarına kimi Naxçıvanda hərbi xidmətdə olub. Təlimlərdə döyüş bacarığı, sərrastlığı ilə komandir və əsgər yoldaşlarının hörmətini qazanıb. Bir nümunəvi əsgər kimi başqalarına örnək olub.
İdmanın qaydasız döyüş növü ilə də məşğul olub. Bu isə ona müharibədə kpmək edib.
Fəryad Azərbaycanın ərazi bütövlüyünün bərpa olunması üçün başlanan Vətən müharibəsində qəhrəmancasına vuruşub. Cəbrayılın və Qubadlının azadlığı uğrunda gedən döyüşlərdə iştirak edib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Fəryad Xəlilov ölümündən sonra "Vətən uğrunda" medalı ilə təltif edilib.
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Fəryad Xəlilov ölümündən sonra "Cəbrayılın azad olunmasına görə" medalı ilə təltif edilib.
Azərbaycanın Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Fəryad Xəlilov ölümündən sonra "Qubadlının azad olunmasına görə" medalı ilə təltif edilib.
memorial.az
