Hüseyn Fərhad oğlu Muradov 1994-cü il mayın 10-da Saatlı rayonu Cəfərxan kəndində anadan olmuşdur. Orta məktəbi Bakıda bitirdikdən sonra 2011-2015-ci illərdə Azərbaycan Dövlət İqtisad Universitetibinin “Ümumi İqtisadiyyat” fakültəsində təhsil almışdır. Universitetdə oxuduğu müddətdə nümunəvi davranışları ilə seçilmiş, müəllim və tələbə kollektivinin rəğbətini qazanmışdır.

2015-ci ildə Murovdağda hərbi xidmətdə olub. 2016-cı il “Aprel döyüşləri”ndə iştirak etmişdir. Bu döyüşlərdə vəzifəsi minaatan idi. Bölükdə minaatan batareyada fəaliyyət göstərmiş, artilleriyaçı olmuşdur. Qarabağ Vətən Müharibəsi başlamazdan bir neçə gün öncə sentyabrın 21-də Müdafiə Nazirliyinin çağırışı ilə ehtiyatda olan hərbçi kimi təlimlərdə iştirak etmək üçün hərbi hissəyə yola düşür. 27 sentyabrda Füzuli istiqamətində başlayan döyüşlərə şücaətlə qatılır. Qarabağ Vətən Müharibəsində pulemyotçu kimi döyüşmüşdür. Dəfələrlə döyüşlərdə böyük qəhrəmanlıqlar göstərir. 8 oktyabr 2020-ci ildə Hadrut uğrunda döyüşlərdə şəhid olmuşdur.

Azərbaycan Respublikası Silahlı Qüvvələrinin hərbi qulluqçularının “Vətən uğrunda” medalı ilə təltif edilməsi haqqında Azərbaycan Respublikası Prezidentinin Sərəncamına əsasən ölümündən sonra "Vətən uğrunda" medalı ilə təltif edilib.

Azərbaycan Respublikası Silahlı Qüvvələrinin hərbi qulluqçularının “Cəbrayılın azad olunmasına görə” medalı ilə təltif edilməsi haqqında Azərbaycan Respublikası Prezidentinin Sərəncamına əsasən “Cəbrayılın azad olunmasına görə” medalı ilə təltif edilib.