Zaur Ağalı 11 dekabr, 1996-cı ildə Lənkəran rayonunun İstisu qəsəbəsində anadan olub. 2003-cü il İstisu qəsəbəsi R.Qurbanov adına orta məktəbə daxil olub, 2014-ci ildə həmin məktəbi bitirib. 2015-ci il, aprel ayında həqiqi hərbi xidmətə yollanıb, 2016-ci ilin oktyabr ayında xidməti başa vurub qayıdıb.
2017-ci ildə ailə həyatı qurub, 2018-ci il, iyulun 7-də bir oğlan övladı dünyaya gəlib.
Azərbaycan Silahlı Qüvvələrinin müddətli həqiqi hərbi xidmət hərbi qulluqçusu olan Zaur Ağalı 2020-ci il sentyabrın 27-də Azərbaycan və Ermənistan arasında başlanan 2-ci Qarabağ müharibəsi zamanı Cəbrayıl,Qubadlı döyüşləri və Zəngilanın azadlığı uğrunda gedən döyüşlərdə vuruşub. Zaur Ağalı Qubadlı istiqamətində qəhrəmancasına vuruşaraq şəhid olub. Zaur Ağalı oktyabrın 22-də yaşadığı qəsəbə qəbiristanlığında, böyük izdihamla dəfn olunub.
Azərbaycanın ərazi bütövlüyünün bərpa edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Zaur Ağalı ölümündən sonra "Vətən uğrunda" medalı ilə təltif edilib.
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Zaur Ağalı ölümündən sonra "Cəbrayılın azad olunmasına görə" medalı ilə təltif edilib.
Azərbaycanın Qubadlı rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Zaur Ağalı ölümündən sonra "Qubadlının azad olunmasına görə" medalı ilə təltif edilib.
