Mahmudov İbrahim Ağagül oğlu 23.11.1998-ci il tarixdə Bakının Maştağa qəsəbəsində anadan olmuşdur. 2005-ci ildə 108 nömrəli tam orta məktəbin birinci sinfinə qəbul olunan İ.Mahmudov 2014-cü ildə məktəbi orta təhsillə bitirmiş və özünün arzuladığı maşın ustası sənətinə yiyələnmişdir. 2017-ci il yanvar ayının 29-da həqiqi hərbi xidmətə çağrılmış, hərbi xidməti müddətində komandirlər və rəisləri tərəfindən verilən tapşırıq və göstərişləri vaxtında və düzgün yerinə yetirməklə özünü intizamlı hərbi qulluqçu kimi göstərmişdir. 2 iyul 2018-ci il tarixdə hərbi xidmətini başa vuran İ.Mahmudov Vətən müharibəsi zamanı könüllü olaraq ordu sıralarına qoşulmuş və 11.10.2020-ci il tarixdə Hadrut istiqamətində gedən döyüşlərdə qəhrəmancasına şəhidlik zirvəsinə ucalmışdır.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən İbrahim Mahmudov ölümündən sonra "Xocavəndin azad olunmasına görə" medalı ilə təltif edilib.