44 günlük Vətən müharibəsi Azərbaycanın öz doğma torpaqlarını mənfur düşməndən azad etməsi ilə nəticələndi. Torpaqlarımızın işğaldan azad edilməsində Azərbaycanın vətənpərvər oğulları canlarından keçdilər. Vətən müharibəsində şəhid olmuş qəhrəmanlarımızdan biri də Ələddin Səidovdur.
Ələddin Azər oğlu Səidov 17 iyun 1992-ci ildə Bakı şəhəri Nərimanov rayonunda anadan olub. 1998-2009-ci illərdə 193 nömrəli tam orta məktəbdə təhsil alıb. 2009-2013-ci illərdə isə Azərbaycan Texniki Universitetinin Maşınqayırma və robototexnika fakültəsində təhsil alıb. Nişanlı idi.
Azərbaycan Ordusunun əsgəri Ələddin Səidov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Cəbrayılın, Füzulinin və Şuşanın azad edilməsi uğrunda gedən döyüşlərdə fəal iştirak edərək şücaət göstərib. Ələddin Səidov noyabrın 3-də Füzuli rayonunun azad edilməsi uğurunda gedən döyüşlərdə həlak olub
Şəhid Bakı şəhərində dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ələddin Səidov ölümündən sonra "Vətən uğrunda" medalı ilə təltif edilib.
Şəhidimiz “Şuşanın azad olunmasına görə” medalına da layiq görülüb.
