Vüqar Vəliyev 22 oktyabr 1995-ci ildə Ağdam rayonunun Rzalar kəndində anadan olub. Azərbaycan Dövlət Bədən Tərbiyəsi və İdman Akademiyasının məzunu olan Vüqar 2017-ci ildə hərbi xidmətə yollanıb. Hərbi xidməti başa vurduqdan sonra 2019-cu ildə müəllimlərin işə qəbulu müsabiqəsində uğur əldə edərək pedaqoji fəaliyyətə başlayıb. Cəmi bir il müəllimlik edən Vüqar Vətən müharibəsi başlayanda məktəbi döyüş meydanına dəyişib. Strateji yüksəkliklərin azad olunmasında rəşadətlə döyüşüb. Suqovuşan istiqamətində gedən döyüşlərdə şəhidlik zirvəsinə yüksəlib.

Şəhidin anası Gülzadə Vəliyeva bildirib ki, atasız böyüyən Vüqar uşaq vaxtlarından zəhmətkeş olub. Evin bütün qayğıları onun çiyinlərində idi. Peşəsini çox sevirdi. Şagirdlər də onu sevirdilər. “Vətəni bizdən üstün tutdu. Şəhid olandan sonra yuxuma girmişdi. Deyirdi yerim yaxşıdır, ağlama. İstəyim odur ki, Vüqar şəhid olan yerə gedim”, - deyə o qeyd edib.

Vüqarın əmisi Əfəndi Vəliyev onun vətənpərvərliyindən danışıb. Bildirib ki, Vüqar düşmənə qisas hissi ilə böyüyüb. "Vüqarın vətənpərvər ruhda böyüməsinə təsir göstərən amillərdən biri də kəndimizin təmas xəttində yerləşməsi, illərdir atəş altında yaşamağımız olub. Vüqar vətənpərvərliyini əməli ilə göstərdi. Torpaqlarımızın azadlığı uğrunda şəhid oldu. Onun dəfni zamanı da düşmən kəndimizi atəşə tutmuşdu. Buna baxmayaraq camaat heç nədən qorxmadan, dəfn mərasimində iştirak etdi. Allahdan bütün şəhidlərə rəhmət diləyirəm".

Şəhidin bacısı Gülnar Məmmədova qardaşı barədə fəxrlə danışıb: "Ailədə bir qardaş, bir bacı olmuşuq. Atamızı kiçik yaşımızda itirmişik. Uşaqlığımız çətin keçib. Vüqar mənə həm qardaş, həm də ata olub. Mənim təhsil almağımda onun əməyi çox olub. Bu gün qardaşımı itirsəm də, onunla fəxr edirəm".

Prezident İlham Əliyevin müvafiq sərəncamları ilə Vətən müharibəsində göstərdiyi şücaətə görə Vüqar Vəliyev ölümündən sonra "Cəsur döyüşçü", "Suqovuşanın azad olunmasına görə" medalları ilə təltif edilib.

memorial.az