Nicat Ayaz oğlu Şükürlü 1991-ci il oktyabrın 23-də Səbail rayonunun Badamdar qəsəbəsində anadan olub. 1998-2009-cu illərdə Bayıl qəsəbəsində 49 saylı "Intellect" liseyində təhsil alıb. 2014-2019-cu illərdə isə Slavyan Universitetində (BSU) "Beynəlxalq münasibətlər" üzrə ali təhsil alıb. Karate idman növü ilə məşğul olub və Azərbaycan daxili yarışlarda bir sıra nailiyyətlər əldə edib. Subay idi.

Nicat Şükürlü 2009-2011-ci illərdə Azərbaycan Silahlı Qüvvələrinin Gədəbəy rayonunda yerləşən "N" saylı hərbi hissəsində müddətli həqiqi hərbi xidmətdə olub.



Azərbaycan Ordusunun çavuşu olan Nicat Şükürlü 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin və Hadrut qəsəbəsinin azadlığı uğrunda gedən döyüşlərdə savaşıb. Nicat Şükürlü oktyabrın 12-də Xocavənd rayonunun azad olunması uğrunda gedən döyüşlər zamanı şəhid olub. Düşmənin atəş nöktələrini və canlı qüvvələrini məhv etdiyinə görə “Vətən uğurunda” medalı ilə təltif olunub. O, Səbail rayonunun Badamdar qəsəbəsində dəfn edilib.

Şəhidin atası Ayaz Şükürov deyir ki, Nicat müharibəyə getməyə can atırdı, buna görə 3 dəfə Hərbi Komissarlığa müraciət edib: "Üçüncü dəfə gedəndə deyiblər, get sabah gələrsən. Deyib, yox getmirəm, bu dəfə məni aparacaqsınız. Sentyabrın 29-da cəbhəyə yollanıb".



Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq Sərəncamları ilə Nicat Şükürlü ölümündən sonra "Vətən uğrunda" , "Xocavəndin azad olunmasına görə", "Füzulinin azad olunmasına görə" medalları ilə təltif edilib.