Sayad Hacıyev 2019-cu ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin Yevlax rayonunda yerləşən “N” saylı hərbi hissəsində xidmət edib. Azərbaycan Silahlı Qüvvələrinin əsgəri olan Sayad Hacıyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. Sayad Hacıyev oktyabrın 17-də Suqovuşan döyüşləri zamanı şəhid olub. Doğulduğu Zaqatala rayonu Qımır Bazar kəndində torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən Sayad Hacıyev ölümündən sonra "Vətən uğrunda" və "Suqovuşanın azad olunmasına görə" medalları ilə təltif edilib.

Zaqatala rayonunun Qımır Bazar kəndində 44 günlük Vətən müharibəsində qəhrəmancasına şəhid olan Hacıyev Sayad Azad oğlunun xatirəsinin əbədiləşdirilməsi məqsədilə onun adını daşıyan abidə-bulaq kompleksi istifadəyə verilib. Açılış mərasimində şəhidin ailə üzvləri, yaxınları, doğulduğu kəndin sakinləri ilə yanaşı, rayon ziyalıları da iştirak edib.