Şəhidlik zirvəsi qəhrəmanlıq simvoludur. O, vətənə məhəbbətdən, torpağa, yurda bağlılıqdan irəli gəlir. Məhz bu sevgi, bir də 30 illik nifrət, qisas almaq əzmi Vətən müharibəsində qəhrəmanlığı alın yazısı seçən mərd oğullarımızı şəhidlik zirvəsinə yüksəltdi. Bu gün vətənimizin göylərində ruhu dolaşan, adı dillər əzbəri olan, ruhu önündə səcdə etdiyimiz şəhidlərdən biri də Ruslan Hümbətovdur.
Hümbətov Ruslan Səlim oğlu 20 may 1987-ci ildə Samuxda anadan olub. 2014-cü ildə XTQ-ya qəbulla bağlı keçirilən kursda 217 nəfər içindən xüsusi fərqlənmə ilə seçilib. 2010-cu ildən ön cəhbədə xidmət edib.
2016-cı ildə gedən döyüşlərdə göstərdiyi xidmətlərə görə medal və xüsusi fərmanla mükafatlandırılıb. 2018-ci ildə Xüsusi Təyinatlı Qoşunlar arasında keçirilən beynəlxalq yarışda Azərbaycanı təmsil edib və birinci yerə layiq görülüb.
Xüsusi Təyinatlı Dəstələrin giziri olan Ruslan Hümbətov 2020-ci il sentyabrın 27-də başlanan Vətən müharibəsi zamanı Füzuli, Suqovuşan, Qubadlı, Murov və Kəlbəcər istiqamətində gedən döyüşlərdə iştirak edib, şücaətlə döyüşüb.
6oktyabr,2020-ci ildə Cəbrayıl rayonu, ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı qəlpə yarasından şəhid olub.
Yaxınlarının dediyinə görə, Ruslan Hümbətov hər ay əmək haqqısının bir qismini bir neçə hərbi yoldaşı ilə ehtiyacı olan insanlara və xəstələrə sərf edirdi.
Ailəli idi, 2 övladı yadigar qalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən,Ruslan Hümbətov ölümündən sonra "Vətən uğrunda" medalı ilə təltif edilib.
Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən, Ruslan Hümbətov ölümündən sonra "Cəbrayılın azad olunmasına görə" medalı ilə təltif edilib.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən, Ruslan Hümbətov ölümündən sonra "Füzulinin azad olunmasına görə" medalı ilə təltif edilib.
Azərbaycan ərazilərinin işğaldan azad olunması zamanı döyüş tapşırıqlarını yerinə yerinə yetirən zaman mərdliyin və igidliyin göstərilməsinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən, Ruslan Hümbətov ölümündən sonra "İgidliyə görə" medalı ilə təltif edilib.
Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən, Ruslan Hümbətov ölümündən sonra "Kəlbəcərin azad olunmasına görə" medalı ilə təltif edilib.
