Paşayev Firdovsi Afiq oğlu 2000-ci il noyabr ayının 14-də Gədəbəy rayonunun Kəlaman kəndində doğulub. Kiçik yaşlarından vətənə, torpağa sevgisi ilə seçilən Firdovsinin ilk arzusu əsgər olmaq idi. Elə bu arzu ilə böyüyən Firdovsi orta məktəbi və daha sonra peşə məktəbini bitirib həqiqi hərbi xidmətə yollanır.
Elə xidmətə başladığı ilk aylardan Komandirləri tərəfindən ailəsinə təşəkkür məktubları gəlir və zamanı gəlincə Firdovsi silahdaşları ilə birgə hünər meydanına atılır. O da qəhrəman qardaşları kimi İkinci Qarabağ müharibəsində Füzuli uğrunda döyüşür. 2020-ci il oktyabrın 18-də Füzuli rayonu istiqamətində gedən döyüşlərdə düşmən tərəfindən atılan artilleriya atəşi nəticəsində şəhadət zirvəsinə yüksəlir.
Gədəbəy rayon Poladlı kənd qəbristanlığında dəfn edilən şəhidimizin bu gün ruhu şaddır. Canını fəda etdiyi torpaqlarımız azadlığına qovuşdu və indi o ana dediyi vətənin qoynunda uyuyur.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Firdovsi Paşayev ölümündən sonra "Vətən uğrunda" medalı ilə təltif edildi.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Firdovsi Paşayev ölümündən sonra "Füzulinin azad olunmasına görə" medalı ilə təltif edildi.
Azərbaycan ərazilərinin işğaldan azad olunması zamanı döyüş tapşırıqlarını yerinə yerinə yetirən zaman mərdliyin və igidliyin göstərilməsinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Firdovsi Paşayev ölümündən sonra "İgidliyə görə" medalı ilə təltif edildi.
