Vətən müharibəsində oğullarımız Qarabağ yanğısı ilə döyüşlərə atıldılar. Onlar 30 illik həsrətin vüsalına qovuşmaq üçün tək qollarının gücü və döyüş bacarığı ilə deyil, həm də ürəyin sevdası ilə döyüşdülər. Qarabağ, Vətən sevdalısından biri də şəhid Yaqub İlham oğlu Yaqubovdur.
O, 1997-ci ildə iyunun 1-də Bərdə rayonunun Kələntərli kəndində doğulub. İgid əsgərimiz 2015-ci ilin iyul ayının 16-da həqiqi hərbi xidmətə çağırılıb. Yaqub hərbi xidmətini uğurla başa vuraraq doğma Bərdəsinə qayıdıb. Vətən Müharibəsi başlayanda igid əsgər düşünmədən könüllü olaraq döyüşlərə qatılıb. Talış Suqovuşan bölgəsində böyük qəhrəmanlıqlara imza atıb. O, oktyabrın 15-də elə bu istiqamətdə gedən döyüşlərdə şəhidlik zirvəsinə ucalıb.
Yaqub Yaqubov ölümündən sonra "Suqovuşanın azad olunmasına görə" medalı ilə təltif edilib.
