2003-cü ildə ailəsi ilə birlikdə Bakı şəhəri, Suraxanı rayonu, Hövsan qəsəbəsinə köçərək təhsilini burada Ə.Məmmədov adına 76 saylı orta məktəbdə davam etdirib. Vüsal 2010-cu ildə orta məktəbi bitirdikdən sonra Bakı İdarəetmə və Texnologiya Kollecində “Yol hərəkətinin təşkili” ixtisası üzrə subbakalavr təhsili alıb.

O, subbakalavr təhsilini bitirdikdən sonra 2015-ci ildə hərbi xidmətə çağırılıb. “N” saylı hərbi hissədə tankçı ixtisası üzrə xidmət keçib. 2017-ci ildə xidməti başa vuraraq evə yollanana Vüsal 21 sentyabr 2020-ci ildə təkrar təlimlərə çağırılıb. O 27 sentyabrda döyüşlər başlayan gündən ön cəbhədə düşmənə layiqli divan tutub. Qəhrəmanımız Şuşa uğrunda döyüşlərdə də aktiv iştirak edib.

Şükürov Vüsal 7 noyabr tarixinə qədər döyüş yolu keçib Xocavənd ərazisinə qədər gələ bilib. Qəhrəmanımız Xüsusi Təyinatlı Qüvvələrin ardınca 8 noyabr tarixində bir çiynində pulemyot, digər çiyinində yük çantası ilə Şuşanın sıldırımlı qayalarına qalxıb. Şuşaya qalxaraq şəhəə daxil olarkən düşmənin minaatandan atdığı mərmi Vüsalın yanına düşüb. Mərmi qəlpələri onun başının arxa nahiyəsini yaralayıb. Qəhrəmanımız aldığı ağır yaradan elə oradaca şəhid olub. Cəbhə yoldaşlarının sözlərinə görə, Vüsal qorxmaz döyüşçü imiş. Şəhadətindən iki gün öncə dostları ilə görüşdə şəhid olacağını hiss etdiyini söyləyibmiş. Şəhidin nəşi 10 noyabr tarixində doğulduğu evə – Şahmallar kəndinə gətirilib, daha sonra Ağcabədi şəhəri Şəhidlər xiyabanına aparılaraq orada torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Vüsal Şükürov ölümündən sonra "Vətən uğrunda" medalı ilə təltif edilib.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Vüsal Şükürov ölümündən sonra "Füzulinin azad olunmasına görə" medalı ilə təltif edilib.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Vüsal Şükürov ölümündən sonra "Şuşanın azad olunmasına görə" medalı ilə təltif edilib.

Azərbaycan ərazilərinin işğaldan azad olunması zamanı döyüş tapşırıqlarını yerinə yerinə yetirən zaman mərdliyin və igidliyin göstərilməsinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Vüsal Şükürov ölümündən sonra "İgidliyə görə" medalı ilə təltif edilib.