Əhmədov Amal Rauf oğlu 3 may, 1996-cı ildə Rusiya Federasiyasının Tver şəhərində doğulub. 2002-ci ildə Gəncə şəhəri 6 nömrəli tam orta məktəbin 1-ci sinfinə daxil olub, 2013-cü ildə həmin məktəbi bitirib, eyni ildə Gəncə Dövlət Regional Kollecinin “Nəqliyyatda daşımaların təşkili” ixtisasına qəbul olub. 2014-cü ildə təhsilini dondurub, "Öncə Vətən" deyərək hərbi xidmətə yollanıb.

Səfərbərlik və Hərbi Xidmətə Çağırış üzrə Dövlət Xidmətinin Gəncə Şəhər Nizami Rayon Şöbəsindən həqiqi hərbi xidmətə çağırılan Amal Müdafiə Nazirliyinin Ağdamdakı “N” saylı hərbi hissəsində xidməti borcunu yerinə yetirib. Hərbi xidmətdən qayıtdıqdan sonra təhsilini davam etdirərək, 2019-cu ildə kolleci bitirib.

2020-ci ilin sentyabr ayında Azərbaycan Ordusunda keçirilən hərbi təlimlərə çağırılıb. 27 sentyabr 2020-ci il tarixində Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhə boyu əks-hücum əməliyyatı ilə başlayan Vətən Müharibəsinə qoşulub. O, Xocavənd rayonunun Ağoğlan (Hadrut) qəsəbəsinin, Füzuli və Cəbrayıl rayonlarının azadlığı uğrunda döyüşüb.

13 oktyabr 2020-ci ildə Füzuli rayonu istiqamətində gedən döyüşlərdə şəhid olub. 9 oktyabr 2020-ci ildə Gəncə şəhərinin Şəhidlər xiyabanında dəfn edilib.

Əhmədov Amal Rauf oğlu Azərbaycan Respublikasının Prezidenti İlham Əliyevin sərəncamı ilə “Vətən uğrunda”, "Döyüşdə fərqlənməyə görə" və “Füzulinin azad olunmasına görə” medalları ilə təltif edilib.