Elburus Verdiyev 2011–2013-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub.

2020-ci il sentyabrın 27-dən könüllü olaraq ordu sıralarına qoşulub və işğal altında olan ərazilərin azad edilməsi üçün başlanan 44 günlük Vətən müharibəsində iştirak edib. O, Füzuli və Qubadlının azadlığı uğrunda gedən döyüşlərdə vuruşub. Elburus Verdiyev noyabrın 6-da Füzuli rayonu istiqamətində gedən döyüşlərdə şəhid olub. Tovuz rayonunun Aşağı Quşçu kəndində dəfn olunub.

Şəhid Elbrus Verdiyevin atası İlyas Verdiyev:

– Dəfnində bütün döyüş yoldaşları gəlmişdilər. Elbrusdan “dostcanlı, səmimi, ünsiyyət qurmağı bacaran, hamının qayğısına qalan, cəsur bir oğlan” deyə bəhs edirdilər . Bilirsiniz 27 yaşlı bir oğul itirmiş ata üçün bu nə deməkdir?! Onların hər birini dinlədikcə ürəyim çırpınırdı, az qalırdı yerindən çıxsın. Bilmirəm, kədər fərəhə, qürura qarışanda beləmi olur? Məni darıxmağa, qüssələnməyə qoymurlar, tez-tez zəng edirlər, halımı soruşurlar. Hər il Rusiyaya gedirdim, orada iş qurmuşdum. İndi heç hara gedə bilmərəm. Elə bilərəm Elbrus “ata, məni tək qoyub hara getdin?” deyər. Yox, gedəsi deyiləm.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elburus Verdiyev ölümündən sonra "Vətən uğrunda" medalı ilə təltif edildi.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Elburus Verdiyev ölümündən sonra "Füzulinin azad olunmasına görə" medalı ilə təltif edildi.