Arif Süleymanov 1994-cü il yanvarın 5-də Goranboyda anadan olub. Atası ona erməni terrorunun qurbanı olmuş qardaşının adını verib.

Azərbaycan Ordusunun kiçik çavuşu olan Arif Süleymanov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı bir sıra mövqelərdə savaşıb. Qəhrəmanımız Kəhrillər xarabalığı, Dostagir, Talış və Suqovuşan yaşayış məntəqəsinin azadlığı uğrunda gedən döyüşlərəd iştirak edib. Arif Süleymanov oktyabrın 8-də düşmən bölmələrinin yerləşdiyi 1444.0 yüksəkliyində düşmənin çoxlu sayda canlı qüvvəsini məhv edib və şücaət göstərərək həlak olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Arif Süleymanov ölümündən sonra "Vətən uğrunda" medalı ilə təltif edildi. Həmçinin qəhrəmanımız Cəsur döyüşçü və Suqovuşanın azad olunmasına görə medalları ilə də təltif edilib.