Elməddin Əhmədzadə Bakıda Fizika, riyaziyyat və informatika təmayüllü Respublika liseyində təhsil alıb. Liseyi bitirdikdən sonra 2014-cü ildə hərbi xidmətə gedib, Xüsusi Təyinatlı Qüvvələrin tərkibində xidmət edib. 2016-cı il hərbi xidməti fəxri fərmanla bitirib.

Elməddin 2016-cı ildə Aprel döyüşlərində də iştirak edib. Vətən müharibəsi başlamasına bir ay qalmış - avqustun 21-də könüllü olaraq yenidən hərbiyə yazılıb və manqa başçısı kimi xidmətə başlayıb. Sentyabrın 27-də Füzuli-Cəbrayıl istiqamətindəki döyüşlərdə aldığı sinayper gülləsi yarasından şəhid olub.

Son dəfə həmin gecə ailəsiylə telefonla danışan Elməddin Vətən müharibəsinin başlamasını "gözlədiyim an gəldi, haqqınızı halal edin, başınızı dik tutun", - deyə xəbər edib.


Azərbaycan Ordusunun əsgəri Elməddin Əhmədzadə Prezident İlham Əliyevin sərəncamına əsasən ölümündən sonra "Cəsur döyüşçü","Vətən uğrunda" və "Füzulinin azad olunmasına görə" medalı ilə təltif edilib.