Şəhidlik zirvəsi qəhrəmanlıq simvoludur. O, vətənə məhəbbətdən, torpağa, yurda bağlılıqdan irəli gəlir. Məhz bu sevgi, bir də 30 illik nifrət, qisas almaq əzmi Vətən müharibəsində qəhrəmanlığı alın yazısı seçən mərd oğullarımızı şəhidlik zirvəsinə yüksəltdi. Bu gün vətənimizin göylərində ruhu dolaşan, adı dillər əzbəri olan, ruhu önündə səcdə etdiyimiz şəhidlərdən biri də Əli Məmmədzadədir.
Əli Turan oğlu Məmmədzadə 2002-ci il fevralın 15-də Bərdə şəhərinin Mirzəbəyli kəndində anadan olmuşdur. O, 5-ci sinifə qədər Bərdə şəhərində təhsil alır. Sonra ailəsi ilə birlikdə Bakı şəhərinə köçürlər. Əli Bakı şəhəri Ziğ kəndinin 63 nömrəli tam orta məktəbin şagirdi olur. Eyni anda həm məktəbi oxuyur, həm də idmana gedir. Məzun olduqdan sonra kompüter kollecinə daxil olur. 2020-ci ilin avqust ayında həqiqi hərbi xidmətə gedir.
Azərbaycan Ordusunun əsgəri olan Əli Məmmədzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində Kəlbəcər, Cəbrayıl, Füzuli və Şuşa rayonlarının işğaldan azad olunmasında fəal iştirak edib.
Əli Məmmədzadə 7 noyabr .2020-ci ildə Şuşa şəhəri ərazisində döyüş tapşırığını yerinə yetirərkən düşmən tərəfindən açılan atəş nəticəsində yaralanmış, 12 noyabr 2020-ci il tarixdə aldığı qəlpə yarasından Silahlı Qüvvələrin Baş Klinik hospitalında vəfat etmişdir .
Azərbaycan Prezidenti İlham Əliyevin Sərəncamına əsasən Əli Məmmədzadə ölümündən sonra bir sıra medallarla təltif edilib.
1. “Hərbi xidmətlərə görə” medalı;
2. "Vətən müharibəsi iştirakçısı medalı" ;
3. “Kəlbəcərin azad edilməsinə görə” medalı;
4. “Xocavəndin azad edilməsinə görə” medalı;
5. “Cəbrayılın azad edilməsinə görə” medalı;
6. “Füzulinin azad edilməsinə görə” medalı.
