Qulamov Rəcəb Heydər oğlu 1996-cı ilin mart ayının 31-də anadan olub. O, 2020-ci ilin sentyabr ayının 8-i müddətdən artıq hərbi qulluqçu kimi xidmətə başlayıb. 19 gündən sonra hərbi əməliyyatlara qatılıb və oktyabr ayının 1-də Murovdağ istiqamətində şəhid olub.
Şəhidimizin nəşi 5 aydan sonra, fevral ayının 19-da Murov istiqamətində gedən axtarışlar zamanı tapılıb. O, Sumqayıtın Şəhidlər Xiyabanında dəfn olunub.
Evin tək övladı olan Rəcəbin atası oğlunun şəhadətindən bir qədər əvvəl rəhmətə getmişdi. O, dostlarına hər zaman "Anamdan muğayat olarsınız!" deyirmiş...
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamlarına əsasən Rəcəb Qulamov ölümündən sonra "Vətən uğrunda", "Kəlbəcərin azad olunmasına görə”, “Vətən müharibəsi iştirakçısı” medalları ilə təltif olunub.
