Dünya vəfasızdır, inanmaq olmaz
İnsanam solsam da, xatirəm solmaz...

Bu misraları Vətən üçün canından keçməyə hazır olan Əli torpaqlarımızı azad etmək üçün düşmən üstə gedərkən deyib.

Azərbaycan Ordusunun əsgəri Əli Tağıyev Azərbaycan Silahlı Qüvvələri tərəfindən Azərbaycanın ərazi bütövlüyünün bərpası uğrunda Vətən müharibəsi zamanı Cəbrayıl və Füzuli rayonları istiqamətində gedən döyüşlərdə iştirak edib.

2016-cı ildə Aprel döyüşlərində də igidlik göstərən Əli Tağıyev oktyabrın 13-də Füzuli döyüşləri zamanı qəhrəmancasına şəhid olub.



Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Əli Tağıyev ölümündən sonra "Vətən uğrunda" medalı ilə təltif edilib.

Cəbrayıl rayonunun işğaldan azad edilməsi uğrunda aparılan döyüş əməliyyatlarında şəxsi igidliyi və şücaətinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən ölümündən sonra "Cəbrayılın azad olunmasına görə" medalı ilə təltif edilib.