27 sentyabr 2020-ci il tarixində Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhə boyu əks-hücum əməliyyatı başlaması barədə qərar verildi. Azərbaycan Ordusunun əsgəri Sahib Həsənov torpaqlarımızın azadlığı uğrunda vuruşlara qatıldı, Murovdağ zirvəsi və Kəlbəcər rayonu uğrunda gedən döyüşlərdə igidliklə iştirak etdi. 17 oktyabr 2020-ci ildə Goranboy rayonu Buzluq kəndi yaşayış məntəqəsi istiqamətində, düşmənlə təmas xəttində Azərbaycanın “İldırım” döyüş mövqeyindən erməni separatçılarının “Qaragöl” döyüş mövqeyinin solunda şəhid olub. 18 oktyabr 2020-ci ildə Gəncə şəhərinin Şəhidlər xiyabanında dəfn edilib.

Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamı ilə Həsənov Sahib Azər oğlu ölümündən sonra “Vətən uğrunda” , 29 dekabr 2020-ci il tarixli Sərəncamla “Kəlbəcərin azad olunmasına görə” , 30 dekabr 2020-ci il tarixli Sərəncamla “Hərbi xidmətlərə görə” medalları ilə təltif edilib.