Mikayıl Vəkil oğlu İsgəndərov 10 fevral 1997-ci il tarixdə Göygöl rayonu Topalhəsənli kəndində anadan olub. 2003-cü ildə Göygöl rayon E.Bayramov adına Topalhəsənli kənd tam orta məktəbinin 1-ci sinfinə gedib, 2014-cü ildə həmin məktəbin 11-ci sinfini bitirib. Mikayıl 2015-ci ilin aprel ayından 2016-ci ilin oktyabr ayınadək “N” saylı hərbi hissədə həqiqi hərbi xidmət keçib. 2020-ci ildə “N” saylı hərbi hissədə müddətdən artıq hərbi qulluqçu kimi xidmətini davam etdirib.
Vətən müharibəsinin iştirakçısı olan Mikayıl İsgəndərov 3 oktyabr 2020-ci il tarixdə Goranboy rayonu Buzluq kəndi yaşayış məntəqəsi istiqamətində hərbi əməliyyatlar nəticəsində şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Mikayıl İsgəndərov ölümündən sonra "Vətən uğrunda" medalı ilə təltif edilib.
Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Mikayıl İsgəndərov ölümündən sonra "Kəlbəcərin azad olunmasına görə" medalı ilə təltif edilib.
