Nazim Həmzə oğlu Zahirov 25 iyun 2001-ci ildə Bakı şəhərinin Bakıxanov qəsəbəsində anadan olub. 2007-2018-ci illərdə 310 saylı orta məktəbdə təhsil alıb. 2018-ci ildə Azərbaycan Dövlət Dəmir Yolu Liseyinə daxil olub. 2019-cu ildə həmin liseyi bitirərək, hərbi xidmətə yollanıb. Hərbi xidmətini Goranboyda keçib.
Əsgər Nazim Zahirov 2020-ci il sentyabrın 27-də başlayan Vətən Müharibəsində Suqovuşan uğrunda döyüşüb. 16 oktyabr 2020-ci ildə Talış-Suqovuşan istiqamətində gedən döyüşlərdə şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamlarına əsasən Nazim Zahirov ölümündən sonra "Vətən uğrunda", "Cəsur döyüşçü” və “Suqovuşanın azad olunmasına görə” medalları ilə təltif edilib.
