2020-ci ildə həqiqi hərbi xidmətə çağırılan Məcid qoçaqlığı və intizamı ilə hərbi hissədə də hər kəsin rəğbətini qazanır. Anasına tez-tez zəng edərək ondan nigaran qalmamasını xahiş edir, öz vəziyyətinin yaxşı olduğunu söyləyirdi ki, anası xiffət çəkməsin.

Anası deyir ki, Vətən Müharibəsinin başladığını eşidən anda illərdir bu günü gözləyirmiş kimi sevinib. Nəhayət Məcidin gözlədiyi gün gəlir. Torpaqlarımızı işğaldan azad etmək üçün müharibəyə qoşulur.

Məcid Məmmədovun arzuladığı qələbəni qazandıq. Amma təəsüflər olsun ki, o zəfər günü görmədən şəhadətə yüksəlir.

Məcid Məmmədov Talış kəndinin və Suqovuşanın azad edilməsi uğrunda gedən döyüşlərdə iştirak edib. 1 oktyabr tarixində kəşfiyyat müşahidə bölüyünün tərkibində Talış kənd istiqamətində 482 yüksəkliyinin azad edilməsi uğrunda gedən şiddətli döyüşdə qəhrəmancasına şəhid olub. Məcid Məmmədov ölümündən sonra ''Suqovuşanın azad olunmasına görə'' medalı və "Vətən uğrunda" medalı ilə təltif edilib.