İlkin Abıyev 2013-2015-ci illərdə Azərbaycan Ordusunun sıralarında müddətli həqiqi hərbi xidmətdə olub. 2017-ci ildən isə müddətdən artıq həqiqi hərbi xidmətə başlayıb.

Kiçik çavuş rütbəsini alan Abıyev 2020-ci il sentyabrın 27-də başlayan İkinci Qarabağ müharibəsində Murovdağ istiqamətində gedən döyüşlərdə savaşıb. İlkin Abıyev müharibənin ilk günü Kəlbəcərdə Murovdağ uğrunda şəhid olub. Vətənin mərd oğlu Biləsuvar rayonunun Əsgərabad kəndində dəfn edilib.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin 15.12.2020-ci il tarixli Sərəncamına əsasən İlkin Abıyev ölümündən sonra "Vətən uğrunda" medalı ilə təltif edilib.

Azərbaycan ərazilərinin işğaldan azad olunmasında mərdlik və igidlik göstərdiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən İlkin ölümündən sonra "İgidliyə görə" medalı ilə təltif edilib.

Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə şəhidimiz "Kəlbəcərin azad olunmasına görə" medalı ilə də təltif edilib.