Ceyhun İfrayıl oğlu Hacızadə 16 avqust 1992-ci ildə Tərtər rayonunun Evoğlu kəndində anadan olub. Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi uğrunda başlanan Vətən müharibəsində könüllü iştirak edib və 2020-ci il oktyabrın 7-də Suqovuşan istiqamətində gedən döyüşlərdə qəhrəmancasına şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ceyhun İfrayıl oğlu Hacızadə ölümündən sonra "Vətən uğrunda" medalı və “Suqovuşanın azad olunmasına görə” medalı ilə təltif edilib.
Şəhid Ceyhun Hacızadənin ailəsi, anası, qardaşı onun haqqında fəxrlə danışırlar. Ceyhunun Vətənə, ailəyə bağlı övlad olduğunu, bütün kənd əhalisinin qürur yerinə çevrildiyini deyirlər. Ceyhun Hacızadə doğulduğu kənddə dəfn edilib. Şəhidin məzarı ziyarət yerinə çevrilib.
