Əlibəyli Mikayıl Xaliqverdi oğlu 1992-ci il, dekabrın 23-də Mingəçevir şəhərində anadan olub. Orta məktəbi bitirdikdən sonra Sumqayıt şəhərində hərbi xidmət keçib. Xidmətdən qayıtdıqdan sonra Bakı şəhərində bir müddət şirniyyat sexində çörəkçi olub. İki il müddətə yaxın isə Mingəçevirdə çörəkçi işləyib.
Vətən Müharibəmiz başlayanda Vətənin müdafiəsinə yola düşüb. Tərtər, Ağdərə, Suqovuşan uğrunda gedən döyüşlərdə iştirak edib. Ağdərə istiqamətində döyüş tapşırığını yerinə yetirərkən oktyabrın 6-da qəhrəmancasına şəhidlik zirvəsinə ucalıb. Oktyabırn 7-də Mingəçevirin Şəhidlər Xiyabanında dəfn edilib.
Prezident İlham Əliyevin müvafiq Sərəncamı ilə “Vətən uğrunda” medalı ilə təltif edilib.
Mikayılın anası deyir ki, bu yarası heç vaxt sağalmayacaq: "Mikayıl mənim sirdaşım, dayağım idi. Bütün çətinliklərdə yanımda idi. Məni qucaqlayanda özümü uşaq kimi hiss edirdim. Nişanlı idi, arzuları çox idi. Hər dəfə zəng edəndə nişanlısına onu gözləməsini deməyimi istəyirdi. Deyirdi ki, mütləq qayıdacaq".
