Kiçik gizir Namazov Elcan Hidayət oğlu 1997-ci il iyunun 1-də Qazax rayonunun Dəmirçilər kəndində anadan olub.
2004-cü ildə həmin kənddə Emin Qurbanov adına orta məktəbin 1-ci sinifə daxil olan Elcan sonradan öz təhsilini Qazax rayonunda yerləşən Texniki Kollecdə davam etdirib.

2015-ci oldə həmin kolleci müvəffəqiyyətlə bitirən Elcan müddətli həqiqi hərbi xidmətə yollandı. 2016-2018-ciillərdə Dövlət Sərhəd Xidmətinin Lənkəran Sərhəd Dəstəsində müddətli həqiqi hərbi xidmətdə olan Elcan əsgər və zabitlərin böyük hörmətini qazanıb.

Sərhədçi peşəsinə maraq göstərən Elcan xidmətini başa vurduqdan sonra 2019-cu il iyunun 22-də müddətdən artıq həqiqi hərbi xidmətə qəbul olundu. 4 aylıq hazırlıq kursunu müvəffəqiyyətlə başa vuran Elcan Dövlət Sərhəd Xidmətinin Çevik Hərəkət Qüvvələrinin Çevik Hərəkət Briqadasında xidmətə başladı. Xidmət etdiyi dövrdə müxtəlif vəzifələrin öhdəsindən məharətlə gələn Elcan öz intizamı və çalışqanlığı ilə seçilirdi.

Vətən müharibəsi başlayanda Elcan da digər sərhədçi yoldaşları kimi ön cəbhəyə yollandı. Füzuli və Cəbrayıl istiqamətlərində ağır döyüşlərdə iştirak etdi. Ancaq, təssüf ki, Elcanın döyüş yolu qısa oldu. O, oktyabrın 9-da Xocavənd rayonunun Hadrut qəsəbəsi istiqamətində gedən döyüşlərdə qəhrəmancasına şəhid oldu.

Subay idi...

Kiçik gizir Namazov Elcan Hidayyət oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən “Vətən uğrunda”, “Döyüşdə fərqlənməyə görə” və “Xocavəndin azad olunmasına görə” medalları ilə təltif edilib.