2004-cü ildə Ələt qəsəbəsinin 302 saylı tam orta məktəbinin 1-ci sinfinə gedib, 2015-ci ildə 11-ci sinifi bitirib. 2016-cı ildə həqiqi hərbi xidmətə yollanıb. Hərbi xidməti Dövlət Sərhəd Xidmətinin Naxçıvan Muxtar Respublikasının Culfa rayonu ilə İran sərhədində keçirib. 2018-ci ilin aprel ayında isə hərbi xidməti bitirib. Hərbi xidməti bitirdikdən sonra Dovlət Sərhəd Xidmətinin gizir kursunda təhsil alıb. 2019-cu ilin aprel ayında Dövlət Sərhəd Xidmətinin Lənkəran korpusunda gizir rütbəsi qrup komandiri vəzifəsi ilə işə başlayıb.


2020-ci il avqust ayında könüllü olaraq Dövlət Sərhəd Xidmətinin Xüsusi Təyinatlı Qüvvələrinin tərkibinə keçib. Avqust ayından Dövlət Sərhəd Xidmətinin Xüsusi Təyinatlı Qüvvələrinin tərkibində Daşkəsən rayonunda təlimlər keçib. Sentyabrın 27-də müharibə başlayan gündən döyüşlərdə iştirak edib. Əvvəl Kəlbəcər istiqamətində Murov zirvəsinin alınmasında iştirak edib. Sonra Cəbrayıl, Zəngilan şəhərlərinin, Xudafərin körpüsünün alınmasında və hamısının bayraq taxılmasında onlarla kəndlərin, o cümlədən Araz çayı boyunca bütün kəndlərin alınmasında iştirak edib. Düşmənin 50-dən çox canlı qüvvəsini məhv edib. Yoldaşları ilə birlikdə düşmənin çoxlu sayda hərbi texnikasını, silah sursatını qənimət götürüblər. Lakin özü təkbaşına düşməni məhv edib. O, düşmənin qumbaraatanını da qənimət götürüb. Döyüş zamanı başlarına qumbara yağışı yağmasına baxmayaraq yanındakı şəhidləri, yaralıları qorxmadan döyüş meydanından çıxarıb. Qumbara yağışı altında yoldaşlarına qorxmadan kömək etdiyinə görə, yoldaşları Elnura nur işığı adı qoyublar.


Oktyabrın 21-də Zəngilan ərazisində düşmən tərəfindən basqın olub. Elnur onlarla düşməni məhv etdikdən sonra düşmən gülləsinə tuş gəlib və döyüş meydanında qəhrəmancasına şəhid olub. Oktyabrın 22-də Hacıqabul rayonunun Navahı kəndində dəfn olunub. O, döyüşdən sonra yaralıları döyüş meydanından çıxararkən şəhid olub.


Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elnur İbrahimov ölümündən sonra "Vətən uğrunda" medalı ilə təltif edilib.

Azərbaycan ərazilərinin işğaldan azad olunması zamanı döyüş tapşırıqlarını yerinə yetirən zaman cəsarət göstərdiyinə, habelə qətiyyətli addımlar nümayiş etdiyinə görə Azərbaycan Prezidenti İlham Əliyevin 18.12.2020-ci il tarixli Sərəncamına əsasən Elnur İbrahimov ölümündən sonra "Döyüşdə fərqlənməyə görə" medalı ilə təltif edilib.

Azərbaycanın Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.12.2020-ci il tarixli Sərəncamına əsasən Elnur İbrahimov ölümündən sonra "Cəbrayılın azad olunmasına görə" medalı ilə təltif edilib.