Nəzir Rahib oğlu Osmanov 1998-ci il yanvarın 1-də Qax rayonunun Qıpçaq kəndində anadan olub.

Azərbaycanın Daxili İşlər Nazirliyinin Daxili Qoşunlarının əsgəri olan Nəzir Osmanov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Şuşanın azadlığı uğrunda gedən döyüşlərdə savaşıb. Nəzir Osmanov noyabrın 1-də Şuşa döyüşləri zamanı şəhid olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Nəzir Osmanov ölümündən sonra "Vətən uğrunda" medalı ilə təltif edildi.

Azərbaycanın Şuşa rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Nəzir Osmanov ölümündən sonra "Şuşanın azad olunmasına görə" medalı ilə təltif edildi.

Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Nəzir Osmanov ölümündən sonra "Kəlbəcərin azad olunmasına görə" medalı ilə təltif edildi.

Nəzir sürücü olsa da, daim yoldaşları ilə birlikdə aktiv döyüşə qatılıb. Həmçinin, bir çox yaralı hərbçimizi döyüş meydanından çıxararaq həyatını xilas edib. Ən böyük arzusu isə şəhidlik olub.

44 günlük qəhrəmanlıq dastanının müəlliflərindən olan Qax rayonunun Qıpçaq kənd sakini Nəzir Osmanov sentyabrın 27-dən döyüşlərə qatılıb. Yaxınlarının sözlərinə görə, Nəzir uşaq yaşlarından çox vətənpərvər və hərbini sevən biri olub. Atası Rahib Osmanov deyir ki, oğlu hər zaman Qarabağın işğaldan azad edilməsində iştirak edəcəyi günü gözləyib:

"Mən fəxr edirəm ki, belə oğul böyütmüşəm. Məktəb vaxtında da oğlum vətənpərvər idi. Həmişə mənə deyirdi ki, mən əsgərlikdən gəlməyəcəyəm, orada qalacağam. Hərbini sevirdi. Həmişə hərbiyə meylli idi".

Nəzir hərbi xidmətini başa vurduqdan sonra Xüsusi Təyinatlı Qüvvələrin sıralarına daxil olub və xidmətini çavuş kimi davam etdirib. Xidməti dövründə də bir neçə dəfə mükafatlandırılıb. Anası Arzu Osmanova bildirir ki, müharibənin ilk günündə övladı sevinə-sevinə döyüşlərə qatılıb:

"Sentyabrın 27-də döyüş olanda dedi ki, "Ana, biz döyüşə gedirik. Narahat olma, ermənilərin hamısını qıracağıq". Mən ana kimi fəxr edirəm ki, oğlum vətənpərvər olub, vətən yolunda şəhid olub, torpağını sevib".

Atası qeyd edir ki, Nəzir döyüşlərdə sürücü kimi şəxsi heyətin və silah-sursatın daşınması ilə məşğul olub. Lakin o, yoldaşlarını heç vaxt tək qoymayaraq həmişə onlarla birlikdə döyüşə qatılıb. Bir neçə yaralı hərbçimizi döyüş meydanından çıxararaq həyatını xilas edib.

Kəndlər, şəhərlər işğaldan azad edildikcə də zəng edərək ailəsinə ilk şad xəbəri özü çatdırmağa çalışıb. Şuşa uğrunda gedən döyüşlərdə yaxınlığına düşən minaatan mərmisinin qəlpəsindən ağır yaralanıb. Xəstəxanaya aparılarkən isə yolda şəhidlik zirvəsinə ucalıb.

"Sürücü idi. Yoldaşları deyir ki, Nəzir sürücü idi. Amma maşının saxlayıb bizlə birlikdə gəlirdi. Deyirdi ki, "Siz döyüşüb mən burada dayana bilmərəm. Sona qədər birlikdə gedəcəyik". Sonuncu dəfə Şuşa yoluna qalxanda maşını saxlayıb. Yoldaşlarını tək qoymayıb, onlarla gedib. Orada düşmənin mərmisinə tuş gəlib. Ağır yaralanıb. Xəstəxanaya aparılarkən yolda dünyasını dəyişib".

Şəhidin dayısı Rövşən Aslanov söyləyir ki, Nəzir hər zaman işğaldakı torpaqlarımızın azad edilməsini, hətta o torpaqlarda şəhid olmağı arzulayıb:
"Torpaqlarımızın düşməndən geri alınması hissini o qədər sevinclə, qürurla yaşayırıq ki. Düzdür, bacım oğlu şəhid olub, amma o ölməzdir. Onun daim ürəyində olan arzusu o idi ki, "Şəhid olacağam, dayı. O torpaqda şəhid olacağam, bir qarış torpağımız düşməndə, işğalda qalmasın". O arzuya da çatdı, ona da nail oldu".

Nəzir doğulub boya-başa çatdığı Qıpçaq kəndində dəfn edilib.