2010-cu ilin mart ayında həqiqi hərbi xidmətdən qayıdıb və bir də 2012-ci ildə - müddətdən artıq hərbi xidmət qulluqçusu olaraq Daxili Qoşunlarda fəaliyyətə başlayıb. Bərdə, Qəbələ və Sumqayıtda xidmətdə olub, təlimlərdə, məşqlərdə və yarışlarda fərqlənib.

Bütün şüurlu həyatı boyunca adını doğruldan Vüqar Daxili Qoşunların (DQ) Xüsusi Təyinatlı Qüvvələrində (XTQ) xidmət edib. Vətən Müharibəsi başlayanda döyüşlərə qatılıb, Cəbrayıl, Füzuli, Hadrut, Zəngilan, Qubadlı, Şuşa uğrunda gedən döyüşlərdə kəşfiyyat qrupunda fədakarlıqla iştirak edib.

Vüqar Füzuli istiqamətində gedən döyüşlər zamanı başından yaralanıb; kəllə-beyin travması ilə xəstəxanaya yerləşdirilib. Xeyli müddət müalicə almasının vacib olmasına baxmayaraq, israrla təkrar döyüşlərə dönüb...



Atası Seyid oğlu ilə arasındakı son dialoqu belə xatırlayır:
- Oğul, yaralısan, tam sağal sonra gedərsən...
- Ata, mən getməliyəm, uşaqlar hamısı döyüşdədirlər, burada qala bilmərəm, yolumu kəsmə... Vətən üçün yarandım, Vətən üçün şəhid olsam haqqını halal elə...

DİN və Milli Ordunun xüsusi təyinatlıları Şuşanı azad etmək üçün hərb tarixinə düşən möhtəşəm bir əməliyyat keçirdilər. Bu böyük qələbəni Vüqar Əkbərov və onun Şəhid qardaşları görməsələr də, Azərbaycan, Türk dünyası onları gördü, tanıdı, bağrına basdı...



Vüqar Əkbərov noyabrın 7-də Şuşa döyüşləri zamanı şəhid olub. Tovuz rayonunda dəfn olunub.



Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sərəncamlarına əsasən, Vüqar Əkbərov ölümündən sonra "Vətən uğrunda", "Cəbrayılın azad olunmasına görə", "Şuşanın azad olunmasına görə" medalları ilə təltif edilib.