Pərviz Hafiz oğlu Tağıyev 1990-cı il martın 22-də Mingəçevir şəhərində anadan olub.

Mingəçevirdə doğulan Pərviz Tağıyev kiçik yaşlarından hərbi sahəyə maraq göstərib. Vətən müharibəsi başlayan gündən MAXE (müddətdən artıq xidmət edən - red.) kimi döyüşlərə qatılıb.

Azərbaycan Ordusunun əsgəri Pərviz Tağıyev toorpaqlarımızın azadlığı uğrunda Vətən müharibəsi zamanı Murov yüksəkliyi, Tərtər rayonunun Suqovuşan kəndi istiqamətində gedən ağır döyüşlərdə iştirak edib. Pərviz Tağıyev sentyabrın 27-də Suqovuşan döyüşləri zamanı şəhid olub.

Pərvizlə yaxınları müharibənin ilk günlərində əlaqə saxlaya biliblər. Sonra isə ondan heç bir xəbər ala bilməyiblər. Onun nəşi uzun müddət tapılmayıb. Müdafiə Nazirliyi tərəfindən rəsmi olaraq itkin düşən hərbi qulluqçu hesab olunub. Qorxmaz, igid gəncin nəşi ölümündən təxminən 220 gün sonra 2021-ci il mayın 5-də Tərtər-Suqovuşan istiqamətində tapılaraq ailəsinə təhvil verilib. Otuz bir yaşlı Pərviz Tağıyev Mingəçevir Şəhidlər xiyabanında dəfn edilib.

Pərviz Hafiz oğlu Tağıyev ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sərəncamı ilə "Vətən uğrunda", "Suqovuşanın azad olunmasına görə" və “Cəsur döyüşçü” medalları ilə təltif olunub.