İki qardaş bir bacı olmaqla ailədə beş nəfər olublar. Uşaqlıq illəri doğulduğu kənddə keçib. 2008-ci ildə Xaçmaz rayon şəhid Əfqan Yəhyayev adına tam orta məktəbin 1-ci sinfinə gedib. Qohum-qonşuları arasında sevilib-seçilən İkram oxuduğu məktəbdə də həm sinif müəllimlərinin, həm də şagirdlərin sevimlisi olub. 2017-ci ildə orta təhsilini əla qiymətlərlə başa vurduqdan sonra Xaçmaz rayon 97 №-li peşə məktəbinə daxil olub və traktorist peşəsi üzrə təhsilini davam etdirib.

2020-ci il iyul ayının 13-də Xaçmaz rayon Hərbi komissarlığı tərəfindən həqiqi hərbi xidmətə çağırılan İkram Gəncə şəhərində yerləşən "N" saylı hərbi hissəyə göndərilib. 3 ay orada xidmət etdikdən sonra Qazax rayonunda yerləşən "N" saylı hərbi hissəyə xidmətini davam etdirməyə göndərilib. Arzusu xidmətini başa vurduqdan sonra hüquq mühafizə orqanları polis vəzifəsində işləmək olur.

Azərbaycan Ordusunun əsgəri olan İkram Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib. Düşmənə sarsıdıcı zərbələr endirib və xeyli sayda canlı qüvvəsini məhv edib.

Qəhrəman İkram 13 oktyabr 2020-ci ildə Azərbaycan Respublikasının ərazi bütövlüyü uğrunda gedən şiddətli döyüşlərdə itkin düşüb. Onun nəşi uzun müddət tapıla bilməmişdir. İkram Məmmədov oktyabrın 13-dən itkin düşmüş hesab olunurdu. Üç ay sonra, yanvar ayının 12-də DNT analizi ilə İkramın şəhid olduğu məlum olur. Şəhid doğulduğu Çiləgir kənd qəbiristanlığında torpağa tapşırılıb.

İ.Məmmədov Vətən müharibəsində itkin düşən 64 hərbçidən biri idi.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 24.06.2021-ci il tarixli Sərəncamına əsasən İkram Məmmədov ölümündən sonra "Vətən uğrunda" medalı ilə təltif edildi.

Azərbaycan ərazilərinin işğaldan azad olunması zamanı döyüş tapşırıqlarını yerinə yerinə yetirən zaman mərdliyin və igidliyin göstərilməsinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən İkram Məmmədov ölümündən sonra "İgidliyə görə" medalı ilə təltif edildi.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən İkram Məmmədov ölümündən sonra "Xocavəndin azad olunmasına görə" medalı ilə təltif edildi.

Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən İkram Məmmədov ölümündən sonra "Füzulinin azad olunmasına görə" medalı ilə təltif edildi.