2010-cu ildə Daxili İşlər Nazirliyinin Daxili Qoşunlarında həqiqi hərbi xidmətə çağırılıb. Hərbi xidmətini əsgər kimi başa vurduqdan sonra könüllü olaraq Daxili Qoşunların Xüsusi Təyinatlı Dəstəsində "çavuş" rütbəsində hərbi xidmətə davam edib. O, dəfələrlə uğurlu xidmətlərinə görə komandanlıq tərəfindən təşəkkürnamələr alıb.

Daxili İşlər Nazirliyinin Daxili Qoşunlarının çavuşu olan Tərlan Eyniyev 2020-ci il sentyabrın 27-də başlayan Vətən müharibəsində Cəbrayılın azadlığı uğrunda gedən döyüşlərdə savaşıb. O, strateji əhəmiyyətli yüksəklik uğrunda gedən döyüşlərdə düşmənin snayperinə tuş gəlib. Çavuş Eyniyev oktyabrın 5-də şəhid olub. Xəzər rayonunda dəfn edilib. Bir vaxtlar özünün tikdiyi evində Tərlanın xatirə muzeyi yaradılıb...



Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığ və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Tərlan Eyniyev ölümündən sonra "Vətən uğrunda" medalı ilə təltif edilib.

Tərlan, həmçinin Cəbrayıl rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidlik və şücaət nümayiş etdirdiyinə görə də Prezident Sərəncamına əsasən ölümündən sonra "Cəbrayılın azad olunmasına görə" medalı ilə təltif edilib.

Şəhid Tərlan Eyniyevin atası Gölişad İsmayıloğlu qəhrəman oğlunun xatirələrini özündə əks etdirən "Hərb sənətində psixoloji ruh" adlı əsər yazır. Artıq kitab üzərində tamamlanma işləri gedir. Əsərdə şəhid Tərlan Eyniyevin Vətən müharibəsindəki iştirakı və göstərdiyi qəhrəmanlıqlar daha dolğun, daha əhatəli işıqlandırılacaq. Vətənə bağlılıq səadəti Tərlanı daim yaddaşlarda yaşadacaq!