Hüseynov Şikar Hüseyn oğlu 1995-ci il oktyabrın 15-də Tovuz rayonunun Çeşməli kəndində anadan olub. Hüseynov Şiraz təhsilini Çeşməli kənd orta məktəbində alıb.
Azərbaycan Silahlı Qüvvələrinin hərbi qulluqçusu olan Hüseynov Şikar Hüseyn oğlu Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Ağdərə istiqamətində gedən döyüşlərdə şəhid olub.
Hüseynov Şikar Çeşməli kənd qəbiristanlığında dəfn edilib.
Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu Hüseynov Şikar Hüseyn oğlu ölümündən sonra Azərbaycan Respublikasının prezidenti İlham Əliyevin sərəncamına əsasən “Vətən uğrunda” medalı ilə və 3-cü dərəcəli “Vətənə xidmətə görə” ordeni ilə təltif edilib.
Tovuz rayonunun Çeşməli kəndinin antiterror Şəhidlərindən olan Şikar Hüseyn oğlu Hüseynovun ikinci övladı, ikinci qızı dünyaya gəlib.
Körpə atasının Şəhidliyindən üç ay 10 gün sonra, 30 dekabr 2023-cü il tarixində dünyaya göz açıb.
Goranboy rayonunda doğulan körpəyə Mələk adı verilib.
Şəhid övladının zəruri xərcləri "YAŞAT" Fondu tərəfindən qarşılanıb. Bu məqsədlə 1 000 AZN vəsait ananın hesabına köçürülüb. Dünyaya yeni göz açan körpənin adına isə depozit hesabı açılacaq və 5 000 AZN vəsait onun hesabına yerləşdiriləcək.
