Qarabağdakı antiterror tədbirləri zamanı şəhid olan Elsəvər Rakif oğlu Qardaşzadə 2004-cü ildə Lənkəran rayonunun Şağlaküçə kəndində doğulub. Mənsum Əbilov adına Şağlaküçə tam orta məktəbini bitirib.
Ödənişli əsaslarla ali məktəbə daxil olsa da, təhsil haqqını ödəmək imkanı olmadığından təhsil ala bilməyib.
Yaxınları bildirir ki, hərbi xidmətdən qayıtdıqdan sonra universitet təhsili almaq arzusunda olub. O, ailədəki 2 qardaşdan kiçiyi olub.
Qeyd edək ki, hərbi xidməti bitirməyinə 10 gün qalmışdı. Oktyabrın 1 - dən ordu sıralarından tərxis olunub ehtiyata buraxılacaqdı. Şəhid Elsəvər Qardaşzadə subay idi.
Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu Elsəvər Rakif oğlu Qardaşzadə ölümündən sonra Azərbaycan Respublikasının prezidenti İlham Əliyevin sərəncamına əsasən “Vətən uğrunda” medalı ilə və 3-cü dərəcəli “Vətənə xidmətə görə” ordeni ilə təltif edilib.
