Quluzadə Nihat Qasımoğlu 24 yanvar 1997-ci ildə Ordubad rayonunun Unus kəndində anadan olub. 2003-2011-ci illərdə şəhid Rahim Babayev adına 2 №-li tam orta məktəbində təhsil alıb. 2011-ci ildə Heydər Əliyev adına Hərbi Liseyə daxil olub. 2014-cü ildə hərbi liseyi bitirdikdən sonra Bakı şəhərində Heydər Əliyev adına Azərbaycan Ali Hərbi Məktəbində "Motoatıcı taqım komandiri" ixtisası üzrə təhsilini davam etdirib.
2018-ci ildə leytenant hərbi rütbəsi alaraq ordu sıralarında taqım komandiri kimi xidmətə başlayıb. 44 günlük Vətən müharibəsinin ilk günündən döyüşlərə qatılıb. Milli Qəhrəman Mübariz İbrahimovun şəhid olduğu postu azad edərkən düşmənin snayper atəşi nəticəsində yaralanıb və 8 saat yaralı halda döyüşü davam etdirib.
Azərbaycan Respublikası Prezidenti cənab İlham Əliyevin müvafiq sərəncamları ilə 3-cü dərəcəli "Vətənə xidmətə görə" ordeni, "Vətən müharibəsi iştirakçısı" , "İgidliyə görə" və "Laçının azad olunmasına görə" medalları ilə təltif olunub.
2021-ci ildə baş leytenant hərbi rütbəsini alıb və "Komando" kursunu bitirirək Azərbaycan Respublikasının Silahlı Qüvvələrində komando kimi xidmətinin davam etdirib. Baş leytenant Nihat Quluzadə 19 sentyabr 2023-cü ildə Azərbaycan Respublikası Silahlı Qüvvələri tərəfindən Azərbaycanın Qarabağ bölgəsində keçirilən lokal xarakterli antiterror tədbirləri zamanı şəhid olub. Ordubad rayonun Unus kəndində torpağa tapşırılıb.
